BERAT VE FERMAN

SULTAN III. AHMED FERMANI

Malatya muzâfâtından Muşar nâhiyesinde vâkî âsude olan Kutbu’l-Arifîn Seyyid Şeyh Ebu’l-Vefâ zâviyesinin zâviyedârlığı evlâd-ı vâkıfa meşrûta olup evlâdiyet ve meşrûtiyet üzere mutasarrıflar olan işbu … fermân-ı hümâyun Seyyid Ali ve diğer Ali ve Yusuf ve Hüseyin ve Kanber bilfiil berât-ı şerîfle mutasarrıflar lâkin taht-ı âlî-baht-ı Osmânî üzere cülûs-i hümâyun-ı saâdet-makrûnum vâkî olmağın Dersaâdetimde müceddeden berât-ı şerîfim verilmek bâbında yedlerinde olan berât-ı atîk mucebince üzerlerinde ise bir aylık resm-i berât mütevellisi yediyle teslim-i hazîne olunmak üzere sadaka idüp bu berât-ı hümâyunu virdüm. Ve buyurdum ki, varup mezburlar zikr olunan zâviyenin kemâ kâne evlâdiyet ve meşrûtiyet üzere zâviyedâr olup, hizmet-i lâzimelerin mer’î ve müeddeb kıldıkdan sonra üslûb-ı sâbık üzere mutasarrıflar olup vâkıfın ruhu ve devâm-ı ömr-i devletim içün duâya müdâvemet göstere, böyle bilüp alâmet-i şerîfe i’timâd kılalar. Tahrîren fi evâsiti şehri R. Fi bidâyeti seneti seb’a aşereti ve mieti ve elf (Rebiülâhir 1117)

SEYYİD EBUL VEFA TACUL ARİFİN VE SEYYİD ŞEYH AHMED TAVİL EVLADINDAN OLAN TEKKEŞÎN VE DERVÎŞÂN ŞEYH HASANLI SEYYÎDLERİ

Vech-i meşruh üzere Malatya kazâsının Muşar nâhiyesinde vâkî Şeyh Hasanlu nâm karye sâkinlerinden Kutbu’l-Arifîn Şeyh Ebu’l-Vefâ ve Şeyh Ahmed Tavîl kuddise sirruhu’l-azîzânın tekyenişîn ve dervîşânı evlâdlarından Seyyid Kanber ve Seyyid Mustafa ve Seyyid Ali ve Seyyid Hasan ve Seyyid Molla Mehmed ve Seyyid Şemseddîn ve Seyyid Ahmed ve Seyyid Hâşim ve Seyyid Selîm ve Seyyid Mehmed ve Seyyid İmam ve Seyyid diğer Mehmed ve Seyyid Ali ve Seyyid Yusuf ve Seyyid Bektâş ve Seyyid Şeyh Hasan ve Seyyid Bâlî ve Seyyid Abbas ve Seyyid İsmail ve Seyyid Osman ve Seyyid Mansur ve Seyyid diğer Ali ve Seyyid Abidîn ve Seyyid diğer Yusuf nâm kimesneler meclis-i şer’e hâzır olup, şöyle takrîr-i kelâm ederler kim, bizler eben an ceddin sahîhu’n-neseb sâdât-ı kirâmdan olup şeyhân-ı merkûmân hazretlerinin tekye-nişîn ve dervişânı evlâdlarından oldukları hasebiyle tekâlîf-i örfiye ve tekâlîf-i şâkkeden min külli’l-vücûh muâf ve müsellem olduklarını müş’ir yedlerinde salâtîn-i mâziye hazretlerinden senedâtları olup muceblerince amel ve hareket oluna gelmiş iken bundan akdem bâzı zâbit ve vâlî taraflarından hisse-i tekâlîf mütalebesinden hâlî olmadıklarına binâen müceddeden men’ olunmaları bâbında yedlerine emr-i celîlü’ş-şân ısdâr olunup hâlen ma’denler emîni Mustafa Beğ Efendi taraflarından nasb ve tâyin olunan Erguvan nâhiyesi zâbiti El-Hâcc Ahmed zîde kadruhu …terâfu’-ı şer’ olunup mazmun-ı emr-i âlîşân muvâcehelerinde sâbit ve nâhiye-i mezbûre nâibi tarafından yedlerine hüccet-i şer’iyye olmağın imdi bunlar muâf ve müsellem olup mevkûfât defteri mucebince nefs-i Malatya kazâsına isâbet eden iki yüz yetmiş üç buçuk avârız …hânesine bağlu arâzi ve emlakları olmadığı ve yedlerinde olan evâmir-i aliyyelerde tasrih ve tastîr buyurulan kuyudât-ı muâfiyetlerine ba’de’n-nazar hâzır-ı meclis olan ahâli-yi Malatya ve nâhiye-i mezbûre ahâlilerinden suâl ve istişhâd olunup mahallinde sened olmak içün mazmun-ı huccet-i şer’iyye Seyyid Yusuf ve Beşîr ve El-Hâcc Ebubekir ve Hacı Hasan ve Behram Oğlu Mustafa Ve Hasan Beşe ve Kuloğlu Seyyid Mehmed ve Ömer ve Hamza Beşe ve Sultaneli oğlu ve İbrahim ve Molla Osman ve İbrahim vesâirlerinin şehâdetleriyle karye-i mezbûr ahâlilerinden eben an ceddin sâdât-ı kirâmdan ve şeyhân-ı merkûmânın tekyenişîn ve dervişânı evlâdlarından oldukları hasebiyle tekâlifden muâf ve müsellem ve avârız hânesine bağlı arazileri olmayup dervişân olduklarına binâen şurût-ı mezkûre üzere taraf-ı şer’den verilen mühri mutâbık huccet-i mezkûre mevkûfâta kayd ve emr-i şerîf i’tâ olunmak ve bu telhîs arz olundukda, imdi telhîs mucebince hucceti mevkûfâta kayd ve tahrir içün hüküm deyu fermân-ı âlî sâdır olmağın fi 21 N. Sene 1177 tarihinde huccet-i mezkûr mahalline kayd ve emr-i şerîf verildiği mukayyedddir. Fermân devletlu inâyetlu sultânım hazretlerinindir.

Fi 20 M. Sene 1191

Hilâfına Kayd Var mıdır?

Hilâfına kayd ve emr-i şerîf verildiğinin kaydı mevkûfâtda bulunmamışdır. Emr u fermân devletlu inâyetlu sultanım hazretlerinindir. Fi 21 M. Sene 1191

Devletlu İnâyetlu Merhametlu Sultânım

Arzıhâl-i kulları, Malatya kazâsında Müşar nâhiyesinde vâkî Şeyh Hasanlu nâm karyede medfûn Kutbu’l-Arifîn Şeyh Ebu’l-Vefâ ve Şeyh Ahmed Tavîl kuddise sirruhu’l-azîzlerin tekyenişîn ve dervîşânı ve evlâdlarından eben an ceddin sahîhu’n-neseb sâdât-ı kirâmdan olup yedimizde âharın avârızı ve tekâlife bağlı emlâk ve arazilerimiz olmayup avârız-ı divâniye ve tekâlif-i örfiye ve Şâkkadan min külli’l-vucûh muâf ve müsellem olup, muâfiyetlerimizi müş’ir yedimizde salâtîn-i mâziyeden muâfnâmelerimiz olup, şimdi a’yân-ı vilâyet ve voyvoda ve ma’den emînleri hilâf-ı inhâ bu dervişân fukarâmızdan tekâlîf-i örfiye ve şâkka mutalebesiyle teaddî ve rencîde eylediklerinden …merâhim-i aliyyelerinden mercûdur ki, kaydı kaleminden derkenâr olup ma’lum-ı devletleri buyuruldukda âherin hilâf-ı şer’ ve muğâyır-ı muâfiyete vâkî olan zulüm ve teaddîsi men’ u def’ etdirilmek bâbında hâk-ı pây-ı devletlerine cesâret olundu. Emr u fermân devletlu inâyetlu merhametlu sultânım hazretlerinindir.

Bende: Seyyid Derviş Hüseyin
Bende: Seyyid Yusuf Ve Seyyid Ali
Bende: Şeyh Ahmed Ve Seyyid Mehmed